दिव्यांग संघटना व पत्रकार संघ सेलू तालूक्यातील दिव्यांगाना फार मोठा आधार – अशोक काकडे

सेलू ( प्रतिनिधी ) दिव्यांग संघटना व पत्रकार संघ सेलू तालूक्यातील दिव्यांगाना फार मोठा आधार असल्याचे प्रतिपादन माजी जि प सभापती अशोक काकडे यांनी केले.

मराठी पत्रकार परिषदेच्या 85 व्या वर्धापन दिनानिमित्त रविवारी दि. 3 डिसेंबर रोजी सेलूत पत्रकार व दिव्यांग आरोग्य तपासणी शिबीर संपन्न झाले. या शिबिरात 350 दिव्यांगांची तपासणी केली व भेटवस्तू देऊन सन्मान केला.
कार्यकामाचे अध्यक्ष माजी सभापती अशोक काकडे तर प्रमुख उपस्थिती म्हणून व्यासपीठावर तहसीलदार दिनेश झांपले, डॉक्टर असोसिएशनचे अध्यक्ष डॉक्टर ऋतुराज साडेगावकर, पत्रकार संघाचे जिल्हा उपाध्यक्ष महंमद इलियास, कांचन कोरडे, सेलू तालुका अद्यक्ष लक्ष्मण बागल, डिजिटल मीडिया सेलू तालुका अद्यक्ष किशोर कटारे,अशोक उफाडे, तसंघर्ष दिव्यांग संघटनेचे अध्यक्ष किशोर साळवे,माजी न प सदस्या शोभाताई कोरडे,एसटी महामंडळाचे चीलवंत, संघर्ष दिव्यांग संघटनेचे जावेद पठाण, अबरार शेख ,यांची उपस्थिती होती.

पुढे बोलतांना अशोक काकडे म्हणाले की मागील दिव्यांग दिना नंतर तहसीलदार दिनेश झांपले यांनी दिव्यांगाचे रेशन कार्ड, तसेच वेतन या संदर्भात योग्य ती पावले उचलून, तात्काळ शहरातील सर्व दिव्यांगांना रेशन कार्ड व वेतन देण्याची व्यवस्था केली आहे. अगदी त्या उलट पालिका प्रशासनाकडून दिव्यांगांच्या बाबतीतील सर्व प्रश्नाकडे कायम दुर्लक्ष करण्यात येते. दिव्यांग दिनी मुख्याधिकारी उपस्थित देखील राहत नाहीत .त्यांचे प्रश्न सोडवण्यासाठी रस दाखवत नाहीत . दिव्यांगांना वेतन देणे, तसेच दिव्यांगांना नगरपालिका हद्दीतील घरे उपलब्ध करून देणे, त्यांना व्यवसाय करता यावा यासाठी नगरपालिकेच्या हद्दीतील दुकाने उपलब्ध करून देणे ,यासाठी नगरपालिकेचे मुख्याधिकारी कुठलेही सहकार्य करत नाहीत .त्यामुळे शहरातील दिव्यांगांना त्रासाला सामोरे जावे लागत आहे. यापुढे नगरपालिका प्रशासनाने, तथा नगरपालिकेच्या मुख्याधिकाऱ्यांनी दिवंग्याच्या प्रश्नाबाबत दुर्लक्ष केले तर, राजकीय व सामाजिक संघटनेच्या माध्यमातून आम्ही लढा उभारून, कायम त्यांच्यासोबत उभे राहण्याची ग्वाही जिल्हा परिषदेचे माजी सभापती अशोक काकडे यांनी दिली आहे.

दिव्यांग हा महत्त्वाचा घटक असून देखील ,कायम दुर्लक्षित घटक आहे – तहसीलदार दिनेश झांपले 

तहसीलदार दिनेश झांपले म्हणाले की ,दिव्यांग हा महत्त्वाचा घटक असून देखील ,कायम दुर्लक्षित घटक आहे .अडचणी भरपूर आहेत. वैयक्तिक, सामाजिक अडचणी आहेत. समाजाचा बघण्याचा दृष्टिकोन ,कमीपणाची भावना निर्माण करणारा असतो .मात्र त्यावर मात करीत दिव्यांगांनी इच्छाशक्ती व जिद्दीने दैनंदिन व्यवहार सुरळीत पार पाडलेले आहेत. दिव्यांगांच्या पालकांना देखील अडचणीला सामोरे जावे लागते .शासनाने नोकरीमध्ये ०३ टक्के आरक्षण दिलेले आहे .त्यासाठी सर्वांनी लक्ष दिले पाहिजे .दिव्यांगासाठी विशेष क्रीडा स्पर्धांचे आयोजन करण्यात येते. शहरातील संघर्ष दिव्यांग संघटना दिव्यांगासाठी खरंच लाभदायी संघटना आहे .
संपूर्ण दिव्यांगांना समाजाच्या व प्रशासनाच्या आधाराची गरज आहे. त्याशिवाय दिव्यांग समाज काहीच करू शकत नाही .सर्वांच्या सहकार्यानेच दिव्यांग समाज उभा राहू शकतो .यासाठी शहरातील पत्रकार संघाने वारंवार दिव्यांगाचे प्रश्न सोडवण्यासाठी प्रयत्न केले आहेत. तसेच जिल्हा परिषदेचे माजी सभापती अशोक काकडे यांनी देखील आजपर्यंत दिव्यांगांचे प्रश्न मार्गी लावण्यासाठी पुढाकार घेतला आहे .त्यामुळे सर्वांनीच यांच्यासारखे पुढे येऊन दिव्यांगाचे प्रश्न मार्गी लावण्याची, मागणी संघर्ष दिव्यांग संघटनेचे अध्यक्ष किशोर साळवे यांनी यावेळी बोलताना केली आहे.

बोगस प्रमाणपत्रांना आळा घालू….डॉक्टर ऋतुराज साडेगांवकर

शहरातील दिव्यांगांना वैद्यकीय अधिकाऱ्यांमार्फत बोगस प्रमाणपत्र देण्यात येत असल्याची माहिती मिळत आहे .मात्र यापुढे कुठल्याही दिव्यांगांना बोगस प्रमाणपत्र देण्यात येणार नाही .यासाठी डॉक्टर संघटनेच्या वतीने प्रयत्न करण्यात येतील ,अशी ग्वाही येथील डॉक्टर असोसिएशनचे अध्यक्ष डॉक्टर ऋतुराज साडेगांवकर यांनी यावेळी बोलताना दिली आहे .ते म्हणाले की, शहरातील प्रत्येक विभागात कार्यरत असलेले डॉक्टर संघटनेचे सदस्य, यापुढे परिसरातील दिव्यांगांना मोफत आरोग्य तपासणी व मोफत उपचार सेवा देतील .दिव्यांग यांचे सर्व प्रश्न मार्गी लावण्यासाठी डॉक्टर असोसिएशनच्या वतीने सर्वतोपरी प्रयत्न करण्यात येतील. अशी ग्वाही देखील यावेळी बोलताना डॉक्टर ऋतुराज साडेगांवकर यांनी दिली आहे.

कार्यक्रमाच्या सुरुवातीला पत्रकार बाळशास्त्री जांभेकर यांच्या प्रतिमेचे मान्यवरांच्या हस्ते पूजन करण्यात आले .कार्यक्रमाचे प्रास्ताविक पत्रकार संघाचे महंमद इलीयास यांनी केले . यावेळी डॉक्टर्स असोसिएशनचे डॉ. सुनील कुलकर्णी ,डॉ. राजेंद्र केवारे, डॉ. अरविंद बोराडे ,डॉ. अशोक नाईकनवरे ,डॉ. आशिष डक ,डॉ. अनुराग जोगदंड ,डॉ. कैलास आवटे ,डॉ. सतीश लिपणे ,डॉ. प्रवीण जोग, डॉ. कारके, डॉ.श्रीनिवास मोरे, डॉक्टर रायते ,डॉ. सुदर्शन मालानी ,डॉ. गजमल ,डॉ आलेश बुरेवार, डॉ सचिन काळे ,डॉ नीरज चेचेडीया,यांची प्रमुख उपस्थिती होती .तसेच परभणी येथील सरस्वती डेंटल कॉलेजचे डॉ. अपूर्वा सोनी, डॉ. किरण सोनटक्के, डॉ. सीमा राठोड, डॉ. पल्लवी दाशेडवाड याची उपस्थिती होती. सर्व वैद्यकीय अधिकारी व कर्मचारी यांची प्रमुख उपस्थिती होती .
यावेळी प्राथमिक स्वरूपात दिव्यांगांना उपयोगी किटचे वाटप मान्यवरांच्या हस्ते करण्यात आले .तसेच सर्व उपस्थित दिव्यांगांची आरोग्य तपासणी करण्यात आली .
कार्यक्रमाचे सूत्रसंचालन सुभाष मोहकरे , किशोर साळवे यांनी केले आहे .तर पत्रकार निसार पठाण यांनी आभार मानले.
कार्यक्रमासाठी डॉक्टर्स असोसिएशन, पत्रकार संघ ,सेलू तालुका डिजिटल मीडिया व दिव्यांग संघटनेच्या सर्व पदाधिकाऱ्यांसह दिव्यांगांची मोठी उपस्थिती होती.
कार्यक्रम यशस्वी करण्यासाठी शेख मोहसीन, संजय मुंढे, श्रीपाद कुलकर्णी, रेवणअप्पा साडेगावकर, अबरार बेग,डिजिटल मीडियाचे सतीश आकात गणेश सवणे संदीप वरकड विठ्ठल राऊत रोहित झोल आदीनी पुढाकार घेतला.