सेलु/प्रतिनिधी – येथून जवळच असलेल्या मोरेगाव शिवारातुन वाहणाऱ्या दुधना नदीच्या कोरडया पडत चाललेल्या पात्रात मागील काही दिवसांपासुन घोंगलपफोडया आणि रंगीत करकोच्यांची जत्रा दिसत असुन उथळ पाण्यात खाद्य सहज उपलब्ध होत असल्याने हे पक्षी गर्दी करत असल्याचे पक्षिनिरीक्षक विजय ढाकणे यांनी सांगीतले.
यावर्षी जिल्हयात सर्वत्रच अत्यल्प पाऊस झााल्याने जिल्हयातील सर्वच नद्या, नाले, पाझर तलावात पाण्याची पातळी खालावलेली असुन अनेक नद्या, ओढे, पाझर तलाव कोरडेठाक पडले आहेत. परंतु मागील आठवडयात आलेल्या अवकाळी पावसाने काही ठिकाणी नदी नाल्यांना पुर आल्याने काही प्रमाणात पाणी जमा झााले आहे तर काही पाझर तलावांमध्ये सुदधा बऱ्यापैकी पाणी जमा झाल्याने अनेक ठिकाणी पाणपक्षी नजरेस पडत आहेत. पक्षीनिरीक्षक विजय ढाकणे, माधव गव्हाणे, शरद ठाकर आणि अनया विजय ढाकणे यांनी दुधना नदीपात्रात पक्षीनिरीक्षण केले असता घोंगलपफोडया (ओपन बिल स्टाॅर्क) किंवा उघडया चोचीचा करकोेचा यांनी मोठया प्रमाणात गर्दी केल्याचे दिसुन आले. त्याच बरोबर रंगीत करकोचे, चक्रवाक बदक, छोटा पाणकावळा, टिटवी, पांढरा बगळा, चमचा (स्पुन बिल), हळदी कुंकु बदक, काळया डोक्याचा शराटी, काळा शराटी आदी पक्षी पाण्याच्या डबक्यात विहार करत असताना आढळुन आल्याची माहीती विजय ढाकणे यांनी दिली.
बदलत्या हवामानामुळे पक्षी अजूनही दूरच
दरम्यान दरवर्षी हिवाळ्याच्या सुरुवातीला परदेशातून भारतात अनेक प्रजातींचे पक्षी स्थलांतर करत असतात. मात्र सतत बदलत्या हवामानामुळे यावर्षी पाहिजे त्या प्रमाणात पक्षी दिसेनासे झाल्याने अजून काही दिवस ह्या पक्ष्यांची वाट पहावी लागणार असल्याची माहिती विजय ढाकणे यांनी सांगितले.
